1 Yoube da amane sia:i,
2 “Dilia da abuliba:le sia:ga nama se iahabela:?
3 Dilia da mae fisili, nama sisa:nonana.
4 Be amomane, na da wadela:i hou hamoi ganiaba, amo da dilima se hame ia:noba.
5 Dilia da dilia noga:i hou da na hou baligiliyale dawa:sa.
6 Gode da amo bidi hamosu nama iasi dagoi.
7 Na da Ea nama ha lai hou higabeba:le, egasa.
8 Gode da na logo ga:i dagoi amola na da amoga bu masunu hame dawa:.
9 E da na gagui liligi huluane samogei dagoi.
10 E da na da:i la:idi la:idi fanana.
11 Gode da ougi bagade, E da nama ha:giwane halasa.
12 E da Ea dadi gagui wa:i, nama doagala:musa:, asunasisa.
13 Gode Ea hamobeba:le, na olalali da na yolesi dagoi.
14 Na fi dunu amola na:iyado dunu huluane da asi dagoi.
15 Dunu amo na da na diasuga aowai, ilia huluane da na gogolei.
16 Na da na hawa: hamosu dunu, e na fidima:ne nama misa:ne ha:giwane edegesea,
17 Na uda da na lafi holo ahoabe, amo ea gaha bagade higasa.
18 Mano fonobahadi da na higale ba:sa.
19 Na na:iyadodafa dunu ilia da na higale ba:sa.
20 Na gadofo da udigili abula agoane, na gasaga gosagisi dialebe ba:sa.
21 Dilia da na samalali! Amaiba:le, nama asigima!
22 Gode da nama se bagade iaha.
23 Na da agoane hanai gala.
24 O e da ouliga hamoi nusi (chisel) amoga igi da:iya dedemu da defea.
25 Be na dawa:! Na esalusu Bu Bidi Lamu dunu da Hebene ganodini esalalala.
26 Amola na da:i da wadela:lesi dagoi ba:mu.
27 Na da na sidafa amoga E ba:mu.
28 Dilia da nama se ima:ne amola doagala:ma:ne, logo hogoi helei.
29 Be wali, dilia beda:mu da defea.