1 Oo mani kawm! Mani sóján gósh dár o
2 Wati dapá pa batal pacha kanán o
3 hamá ke má eshkotag o zántagant,
4 Eshán cha áyáni chokk o nomásagán chéra nadayén,
5 Áiá gwáhié pa Ákubá esht,
6 tán démi naslesh bezánant o
7 tánke á ham Hodáay sará tawkal bekanant o
8 Wati pet o pirénáni paymá mabant,
9 Epráimi, harchont ke gón kamánán selahband atant,
10 Áyán Hodáay ahd nadásht o
11 Áiay kortagén káresh shamoshtant,
12 Hamá kár ke áyáni pet o pirénáni démá kortagatanti,
13 Áyáni démay daryái ném kort o ái gwázéntant,
14 Róchá, gón jambará rashónii dátant o
15 Gyábáná, talári tal kortant o
16 Cha talárán chammagi bótkant o
17 Bale áyán angat géshter gonáh kort o
18 Hodáesh pa zánt hamá warákáni sará chakkáset
19 Hodáay helápá habaresh kort o gwashtesh:
20 Talári wa jat o cha áiá áp rawán but o
21 Hodáyá ke eshkot, zahr gept,
22 Chiá ke Hodáay sará imánesh néstat o
23 Ásmáni pa pach bayagá parmán dát o
24 Manni pa áyán chó hawrá gwart ke bwarant,
25 Mardomán préshtagi warák wárt,
26 Cha ásmáná ródarátki gwáti sar dát o
27 Danzáni paymá pa áyán góshti gwárént,
28 áyáni ordgáhá éri áwortant,
29 Wárt o séresh kort,
30 Bale cha áyáni hersay purah bayagá pésar,
31 Hodáay hezhm áyáni sará pád átk,
32 É sajjahén káresh distant o angat ham gonáhesha kort o
33 Gorhá áyáni róchi pa náhudagi halás kortant o
34 Hodáyá ke áyáni koshag bendát kort, nun áiay shóházá dar kaptant.
35 Hayálá kaptant ke Hodá áyáni talár ent,
36 Bale gón wati dapá, gón áiá charpzobániesha kort o
37 Delesh gón áiá wapádár naat o
38 Bale á angat mehrabán at o áyáni gonáhi bakshetant o
39 Zánti ke é hákién ensán ant,
40 Gyábáná chinchok randá cha Hodáyá sarkashiesh kort,
41 Rand pa randá Hodáesh chakkáset,
42 Áiay dastay zóresh yát nakort
43 hamá wahdá ke Mesrá wati neshánii paddar kortant o
44 Áyáni kawri hóná badal kortant
45 Makeskáni rombi áyáni nyámá ráh dátant ke makeskesh bwarant o
46 Áyáni keshári madagáná dátant o
47 Áyáni anguri gón tróngalá zawál kortant o
48 Áyáni ramagi pa tróngal koshtant o
49 Wati sóchókén kahr o gazabi áyáni sará rawán dát,
50 Ráhi pa wati hezhmá rást o tachk kort,
51 Mesray sajjahén awali chokki jatant,
52 Bale wati mardomi ramagay paymá sar dát o bortant,
53 Ái pa émeni rahshóni kortant ke matorsant
54 Gorhá ái wati pákén zeminá sar kortant,
55 Áyáni démá kawmi cha ódá dar kortant,
56 Bale angat áyán borzén arshay Hodá chakkáset o
57 Wati pirénáni paymá rástén ráhesh yalaha dát o béwapá butant,
58 Borzén jáhán bothánahesha bast o Hodáesh zahra baráént,
59 Hodáyá ke dist, sakk hezhm gept o
60 Wati Shiluhay menendjáhi yalah kort,
61 Wati zór o wákay pétii bandig kanáént,
62 Wati kawmi zahmáni dapá dát,
63 Warnáén bachak, ásá wártant o
64 Dini péshwá zahmáni dapá kaptant o
65 Nun Hodáyá anchosh jáh jat ke yakké cha wábá bosta kant,
66 Wati dozhmeni jat o poshtá kenzént o
67 Bale Issopay tambui nádóst kort o
68 Yahudáay kabilahi gechén kort,
69 Wati pákén jágahi, borzagáni paymá addh kort,
70 Wati hezmatkárén Dáudi gechén kort o
71 cha edá o rand, ái cha mésháni shopánkiá dar kort o
72 Dáudá gón sápén delé áyáni shopánki kort o