1 I Yinni Gusunɔ siɑro win tɔn ɡeerun sɔ̃.
2 Be u yɑkiɑ, bu nùn siɑro.
3 Be u mɛnnɑmɑ tem kpuron di, bu nùn siɑro.
4 Wee bɑ rɑɑ kɔ̃ɔre ɡbɑburɔ mi ɡɑ̃ɑnu ku rɑ kpi bɑ sirenɛ,
5 Gɔ̃ɔru kɑ nim nɔru ɡɑ bu ɡo.
6 Ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ,
7 U bu kpɑrɑ swɑɑ ɡeɑ sɔɔ bɑ kɑ turɑ mi bɑ koo sinɑ.
8 Bu nùn siɑro win tɔn ɡeeru kɑ win sɔm mɑɑmɑɑkiɡinun sɔ̃ ni u rɑ ko tɔnun sɔ̃.
9 Domi u wi nim nɔru ɡɑ mɔ̀ nim kɑ̃.
10 Gɑbu bɑ rɑɑ wɑ̃ɑ yɑm wɔ̃kuru sɔɔ sere ɡɔribun wɑ̃ɑ yerɔ bɑ yoru dimɔ,
11 yèn sɔ̃ bɑ Yinni Gusunɔn ɡɑri yinɑ,
12 Mɑ u derɑ bɑ tii kɑwɑ wɑhɑlɑ yen sɔ̃.
13 Adɑmɑ ben nɔni swɑ̃ɑ te sɔɔ,
14 U bu yɑrɑ yɑm wɔ̃ku te, kɑ ɡɔribun wɑ̃ɑ yee ten min di,
15 Bu Yinni Gusunɔ siɑro win tɔn ɡeerun sɔ̃.
16 Domi u sii ɡɑndun ɡɑmbobɑ kɔsukɑ.
17 Gɑri bɑkɑsu su tii kuɑ wɔnwɔndobu sin dɑɑ kɑ sin torɑnun sɔ̃.
18 Bɑ ku rɑ mɑɑ dĩɑnu kɑ̃ mɑ bɑ ɡɔɔ turuku kuɑ.
19 Ben nɔni swɑ̃ɑ te sɔɔ, bɑ Yinni Gusunɔ nɔɔɡiru sue bɑ somiru kɑnɑ.
20 Kɑ win ɡɑriyɑ u bu fɑɑbɑ kuɑ,
21 Bu Yinni Gusunɔ siɑro win tɔn ɡeeru kɑ win sɔm mɑɑmɑɑkiɡinun sɔ̃ ni u rɑ ko tɔnun sɔ̃.
22 Bu nùn siɑrɑbun yɑ̃kunu kuo.
23 Be bɑ ɡoo nimkusu duɑ, mɑ bɑ ben sɔmburu mɔ̀ si sɔɔ,
24 bɑ Yinni Gusunɔn nɔmɑn sɔmɑ wɑ
25 U ɡɑri ɡeruɑ, mɑ u derɑ woo bɔkɔ ɡɑ seewɑ
26 Nù n dɑ wɔllɔ, kpɑ nu sɑrɑmɑ.
27 Tirerɑbu bu mwɑ, bɑ bɑ̃ɑrimɔ nɡe tɑm nɔrobu.
28 Ben nɔni swɑ̃ɑ te sɔɔ,
29 U woo ɡunɑ ye yɔ̃rɑsiɑ, mɑ nim kurenu nu mɑri.
30 Mɑ be kpuron nuki dorɑ ye u kɑ ye kpuro mɑrisiɑ.
31 Bu Yinni Gusunɔ siɑro win tɔn ɡeeru
32 Bu nùn wɔlle suo mi tɔmbɑ mɛnnɛ.
33 Yinni Gusunɔwɑ u rɑ dɑɑrun nim ɡberɑsie,
34 Kpɑ u tem ɡem ɡɔsiɑ tem bɔruɡum mɛn tɔmbun nuku kɔ̃surun sɔ̃.
35 Wi turowɑ u rɑ mi ɡɑ̃ɑnu ku rɑ kpi ɡɔsie nim bwee bɑkɑru.
36 Kpɑ u be bɑ ɡɔ̃ɔru bɑrɔ sinɑsiɑ mi,
37 kpɑ bu resɛm dɑ̃nu duure mi, nu mɑ dɑbi dɑbiru.
38 U rɑ bu domɑru kue bu dɑbiɑ.
39 Adɑmɑ ɡɑbu bɑ dɑbiru kɑɑre bɑ wɑ̃ɑ sekuru sɔɔ
40 Mɑ Yinni Gusunɔ u derɑ bɑ ben wiruɡibu ɡɛmɑ,
41 Adɑmɑ u rɑ sɑ̃ɑro yɑre win sɑ̃ɑrun di.
42 Gemɡibu bɑ̀ n nùn wɑ, bɑ rɑ yɛ̃ɛriwɑ.
43 Wi u bwisi mɔ, u de u ɡɑri yi kpuro nɛnɛ