1 Ritonõpo Kuesẽkõ tõturuse ya ahno tõ poko.
2 Tõturuse ya Neko tõ poko, Ejitu tuisary, isoutatu tõ maro, typoremãkase aexityã poko Karakemi po, tuna Eupyrati pũto. Tuisa Napukotonozo a Papironia tuisary a typoremãkase Neko tomo. Moro toehse asakoropane jeimamyry taropose ahtao Jeoakĩ a, Joxia mũkuru, Juta põkõ esemy. Ejitu poko ynara tykase Ritonõpo:
3 “Ejitu põkõ soutatu tõ tuisary ynara kohtãko mã toto:
4 Kawaru tõ kyryry tyritoko oekykõ pona õtyritohkõme epona xine!
5 “Yrome oty enẽko ywy?”
6 Mokaro axĩ tururume ytoketõ epasaromepyra mã toto;
7 Onoky mokyro, onuhkety, tuna Niro samo, zueme tuna exiryhtao pehme toehse ahtao, ehpio tyneryse ahtao.
8 Ejitu mokyro, onuhnõko Niro samo zueme ahtao, tuna samo ehpio kõ tyneryse ahtao.
9 Ejitu põkomo, kawaru tõ aropotoko, kahu tõ roropa axĩ toto ytotohme etonatoh taka!
10 Sero ẽmepyry ahno apiakatohme Ritonõpo a, Kuesẽkõ Jamihmehxo Exiketyme mana!
11 Ejitu põkomo, ytotoko Kireate pona opi zupise!
12 Imeimehnõ nonory po tokãtose oehxirotopõpyry poko, oporemãkatopõpyry poko.
13 Papironia tuisary, Napukotonozo tooehse ahtao Ejitu tõ nonory poremãkapose, Ritonõpo tõturuse ya, ynara tykase:
14 “Ynara kahtoko pata tõ po, Ejitu po:
15 Oty katohme oneponãmarykõ jamihme exikety toepukase?
16 Ejitu põkõ soutatu tõ tõsetapase; toepukase toto.
17 Ejitu esẽ esehpatoko sero esety kasenato ke:
18 “Ywy, tuisame Exikety oturũko ase.
19 “Ejitu põkomo, atakimatoko tarose oehtohkõme imehnõ poetoryme!
20 Pui ẽxiry sã Ejitu mana kurano, tupurusẽme moromoroimo a inikahpoe aehtyamo a.
21 Soutatu tõ epehmãko mã toto takorehmatohkõme repe,
22 Ejitu põkõ epãko mã toto,
23 Itu akohnõko mã toto, tupime moro taka omomyry ahtao ro;
24 Ejitu põkõ toehxirose mã toto,
25 Ritonõpo, Jamihmehxo Exikety, Izyraeu tõ Esemy ynara tykase:
26 Mokaro ekarõko ase toto etapary se exiketomo a, tuisa Napukotonozo a hkotano, Papironia esemy ipoetory tõ maro. Yrome imeĩpo mokaro ahno oehnõko ropa mã toto Ejitu nonory pona ehse. Ywy, Ritonõpo, oturuno.
27 “Ypoetory Jako pakomotyamo, enaromyra ehtoko!
28 Amaro xine exĩko ase opynanohtohkõme.