1 Wajcaw, yi ilu' kaRyosil,
2 Wajcaw, ulk tx'akx yi tanumu' tc'u'lu'.
3 Na yi ka'ama'l, ja el cu'n swutz.
4 Ej nin yi e' contru', ate' xe yi ca'lu'.
5 Ta', ja cho'c tan xite'n cyakil yi at xe yi ca'lu'.
6 Cho'n cunin quitane'n tan xite'n chi na ban jun yaj tan cu'se'n e'chk tze' wi jun cojbil.
7 Ej nin ncha'tz ja oc k'a'kl tircu'n cya'n.
8 Ncha'tz Ta', nk'e'tz ntina'tz, ma na ja baj chixitul cyakil yi e'chk ca'l kale na koque't tan c'u'laje'nu'.
9 Qui't na jal yi e'chk takle'n yi at xe'.
10 Ma jalu' ilu' kaRyosil,
11 ¿Mbi tzuntz yi qui na ẍchaju' yi poreru' scyetz?
12 Na sajle'n tunintz ilu' yi ketz kaRyosil, nin ja xcye'u' scye'j wi'nin kacontr yi ate' bene'n tzi'n wi munt.
13 Ej nin tan yi teru' poreru', ja cu' jatxolu' yi mar.
14 Nin ja ben jo'lilu' yi wankil tul jun ama'l tz'inunin tu', tetz chiwa' yi e' smaron txuc.
15 Ncha'tz ilu' bnol tetz yi e'chk tzanla' tu e'chk k'ab a', yi at bene'n tzi'n.
16 Ilu' txumul tetz yi tkan skil tu yi tz'o'tz, na ilu' bnol tetz yi k'ej tu yi xaw.
17 Nin ilu' txumul tetz yi tiemp tetz k'alaj tu yi tiemp tetz cresum.
18 Wajcaw, ulk tx'akx tc'u'lu', yi ilenin na tzan yi contru' tan telse'n k'eju'.
19 Ej nin o' eli'ch te c'u'lu'.
20 Ulk tx'akx tc'u'lu' yi yolu' yi suknaku' sketz, na wi'nin biyol nak bene'n tzi'n.
21 Quil tak'u' ama'l tan tele'n chik'ej cyakil yi e' tal prow, yi e' yi buchijche'.
22 Ma jalu' ilu' kaRyosil, oku' il te'j.
23 Na yi e'a'tz, nternin na chiẍch'in tan telse'n k'eju'.