1 Cyak'e'u' chik'ajsbilu' tetz Ryos, cyakil yi e'u' yi e'u' balaj.
2 Katyoẍink bin tetz Kataj.
3 Kabitzij jun ac'aj bitz swutz i'.
4 Yi yol Kataj bintzi nin tetz.
5 Wi'nin na pek' i' scye'j yi e' tz'aknak cu'n, nin yi e' yi jicyuch te cyajtza'kl.
6 Cyakil yi tcya'j tu cyakil yi at tul, i' bnol tetz.
7 Ja xcye' i' tan jutz'e'n, nin tan colche'n cyakil yi a' yi at xe mar.
8 Kak'e' bin k'ej i' cyakil o' yi o' wunak.
9 Na ja tal Kataj: “Na waj bnix e'chk takle'n.”
10 Qui na tak' Kataj ama'l scyetz yi e' mal wunak tan bixewe'n yi cyetz cyajbil.
11 Poro cyakil yi e'chk takle'n yi na xtxum Kataj, cya'l jun na xcye' tan xite'n.
12 Ba'n teri yi ketz kanación na yi Kataj i' yi kaRyosil.
13 Na che' til Kataj cyakil yi e' wunak yi ate' bene'n tzi'n wi munt.
14 Cho'n at i' jalen tzi'n tcya'j, poro na ko' til na' ato' quent lakak e'chk ama'l.
15 Na i' mbnon cyakil chiwankil, nin i' na i'lon cyakil yi na chitzan tan banle'n.
16 Quil clax jun ajcaw, yi ko cho'n tu' k'uklij c'u'l te jun c'oloj sanlar.
17 Nin quil xcye' jun chej tan colche'n jun yaj, mpe chin cham nink yi chej.
18 Poro yi Kataj, na che' q'uicy'lej yi e' yi na cyak' k'ej i', nin yi e' yi cho'n k'uklij chic'u'l te yi tetz balajil.
19 Na na chiclax ta'n tk'ab quimichil.
20 Yi o' ketz, cho'n k'uklij kac'u'l te Kataj, na tz'ocopon i' tan kacolche'n nin tan kuch'eye'n.
21 Yi o' ketz na katzatzin te'j.
22 Kataj lok ltak'u' yi xtxaxl talma'u' sketz, na ntin at kach'iw te'ju'.