1 Wi'nin na chimpek' te Kajcaw, na ja tbit i' intzi' inkul.
2 Na na tak' ama'l tan tbite'n yi mbi na injak tetz.
3 Jalt nin tan waje'n ẍchixo'l yi e' alma', na nsken chintx'amxij tak'un quimichil.
4 Quimichtlen tu' atine't yi mme'l intzi' tetz Kajcaw tan jakle'n ẍch'eybil wetz.
5 Na el k'ajab i' ske'j.
6 Na oc i' tan chicolche'n yi e' sloj wunak.
7 Cha'stzun te, jalu' qui'ct tzimbislej, na chumbalaj nin ban i' swe'j.
8 Na ja ne'l liwr ta'n tk'ab quimichil.
9 Te yi cobox k'ej yi atin tzone'j ẍchixo'l yi e' yi itz' e', tzinjoye' puntil tan qui injuchul wil swutz i'.
10 Ilenin ja k'uke' inc'u'l te Wajcaw.
11 Te yi atin tul sotzaj c'u'lal, cya'l jun oc tan wuch'eye'n.
12 ¿Ẍe'n tzimban tan ẍchojle'n tetz Kajcaw yi mbi cu'n ban i' swe'j?
13 Swoye' yi jun lak ta'al uva teru' Wajcaw, na yi jun laka'tz na ẍchaj yi na chintzatzin, na ja chincolpij tanu'.
14 Nelepon cu'n te yi inyol yi insuknak teru'.
15 Wi'nin na bisun Kajcaw, yi na chiquim yi e' tetz, yi e' yi xansa'n che' ta'n, yi e' yi cho'n k'uklij chic'u'l te'j.
16 Ilu' Wajcaw, in ẍchakumu', in xconsbe'tzu'.
17 Swak'e' intx'ixwatz teru' yi na ẍchaj yi na chintyoẍin teru'.
18 Nelepon cu'n te yi inyol yi insuknak teru'.
19 Tzimbne' tane'n le tnum Jerusalén.